Tíðindi frá Yrkisfelagnum

Sostatt skuldi stýrið skipast aftur. Í dag, 18. sep. var avgjørt, at Nikolina Olsen tekur sessin sum næstforkvinna eftir Jóhan Petur Holm. Nikolina hevur áður verið forkvinna í Yrkisfelagnum, og vit fegnast um, at hon vildi átaka sær hesa uppgávu.

Birna Heinesen er í farloyvi, men heldur tó fram við uppgávunum sum kassameistari.

tja/august 2024

Hugbreytin á miðnámi í fríum falli

Tá ið umsóknarfreistin til miðnám var farin 15. mars í ár, vísti tað seg, at færri lesandi søktu um at sleppa at ganga á hugbreytini, og hugbreytin er minkað nógv. Hetta var væntandi, tí ein fyrsta ávaring kom longu í fjør, tá ið umsóknartalið lækkaði nógv. Men hugbreytin má ikki blakast fyri borð. Vit hava tørv á teimum eginleikum og tí hugsunarhátti, ið hugbreytarnæmingar fáa í skjáttuna. Missa vit hugbreytina, missa vit breytina, har pláss er fyri at læra fremmandamál, at læra um fremmandar mentanir, at fara í dýpdina við hugburði, sjónarmiðum, kjaki og øðrum. Hugvísindaligi hugsunarhátturin hevur týdning í einum samfelagi, har vit arbeiða meira og meira og skjótari og skjótari og gerast strongdari og strongdari. Hugbreytin gevur førleikar, ið ikki altíð eru so lættir at viga og máta, men sum tó hava týdning fyri bæði samfelagið og einstaka menniskjað.

Ein orsøk, til at hugbreytin minkar, sigst vera kravið um at hava havt týskt í fólkaskúlanum. Ongin lærugrein er kravd fyri at verða upptikin á búskaparbreyt á miðnámi, og á náttúrubreyt skal næmingurin hava havt alis- og evnafrøði fyri at verða upptikin. Allir næmingar hava alis- og evnafrøði í 7. flokki, og seinnu árini kann lærugreinin veljast. Øll kunnu søkja á búskaparbreyt, tí har er onki krav um ávísa lærugrein. Men næmingar skulu aktivt velja týskt í 8. flokki uttan at hava havt tað sum kravda lærugrein fyrst fyri at hava møguleika at søkja um upptøku á hugbreytini. Hesin mismunur tænir als ikki nøkrum næmingi og hevur ført við sær, at umsóknartalið á hugbreyt er lækkað alt ov nógv seinastu árini.

Tað, ið næmingarnir duga, áðrenn teir koma á miðnám, sæst aftur á breytunum. Búskaparbreytin sigst vera tann breytin, ið nú noyðist at taka allar teir næmingarnar, ið ikki tímdu at velja týskt í fólkaskúlanum. Og eg sigi tey ikki ring fyri tað. Týskt fyllir rættiliga nógv í tímatalvuni. Alis- og evnafrøði er í 7., 8. og 9. flokki við ávikavíst 60, 60 og 90 tímum. Týskt fæst í 8., 9. og 10. flokki og fyllir 120, 120 og 120 tímar. Hesir tímar skulu aktivt veljast til, meðan teir fyrstu 60 í alis- og evnafrøði longu eru í skjáttuni, uttan at næmingurin brúkar vallærugrein til tað. Tað sigur seg sjálvt, at tað bert er ein lítil partur av næmingunum, ið velur týskt, tá ið tað fyllir so stóran part av tímatalvuni, og tað lættliga ber til at sleppa á miðnám uttan at velja týskt.

Her mugu okkara myndugleikar traðka til og ganga fremst. Hugbreyt, náttúrubreyt og búskaparbreyt eru komplementerar breytir, har ongin er týdningarmiklari enn onnur. Men soleiðis sum myndugleikar okkara hava skipað krøv í fólkaskúla og miðnámi, kann ein fáa ein varhuga av, at soleiðis er tað ikki í veruleikanum. Okkara samfelag er í ferð við at fáa tunnilsjón, har førleikar, ið liggja nær náttúrubreyt og búskaparbreyt, eru í fokus, og førleikar, ið liggja hugbreytini nær, hvørva meira og meira. Hetta eiga vit ikki at lata ganga. Okkara samfelag hevur tørv á, at vit borgarar eru ymiskir og hava ymiskar førleikar og bakgrundir.

Tíðin er komin til, at myndugleikarnir broyta hetta og javnseta breytirnar. Allar dyr eiga at vera opnar, tá ið næmingurin er liðugur við fólkaskúlan. Antin skal týskt verða kravd lærugrein í fólkaskúlanum eins og alis- og evnafrøði, ella mugu dyrnar javnsetast soleiðis, at ongi krøv verða sett fyri upptøku á nakrari breyt. Hetta síðsta ivist eg stórliga í, at nakar ynskir. Krøv kunnu saktans setast næmingum. Hetta er skúli, endamálið er at læra. Við at seta krøv um ávísar lærugreinar til ávísar breytir, tryggjar mann, at næmingarnir hava eina grundleggjandi viðkomandi vitan. Hetta kann gera skiftið frá fólkaskúla til miðnám lættari og samstundis minka vandan fyri fráfalli á miðnámi, tí at gjógvin er ov stór millum skúlastigini.

Fyri hugbreytina er tað neyvan avgerandi, hvørt tað er týskt ella franskt, ið er kravd lærugrein (týskt verður tó ofta mett at stuðla føroyskum sum lærugrein), men tað hevur týdning, at næmingarnir hava lært at læra eitt fremmandamál og enntá eitt, har orðfeingið ikki kemur nærum av sær sjálvum við filmum, Youtube, TikTok og øðrum appum.

Lat okkum geva ungu borgarum okkara fleiri møguleikar heldur enn færri. Lat okkum fjálga um fjølbroytni næminganna og geva teimum javnsettar møguleikar at velja breyt á miðnámi.

Tina K. Jakobsen, forkvinna

Yrkisfelagið Miðnám

Stýrið hevur skipað seg

Takk, Birna, fyri tín frálíka innsats sum forkvinna í Yrkisfelagnum seinastu tvey árini. Tú hevur leitt felagið væl í mongum málum og her at enda eisini seinastu samráðingunum, ið endaðu við einari søguligari høgari lønarhækkan. Tú hevur sera gott innlit í økið og lukkutíð heldur tú fram í nevndini sum kassameistari, nú tú ynskti nýggjan sess. Á henda hátt varðveita vit tíbetur títt íkast í Stýrinum.

Á fundi 2. februar 2024 skipaði Stýrið seg soleiðis: Tina K. Jakobsen, forkvinna, Jóhan Petur Holm, næstformaður, Maria Chun Nielsdóttir, skrivari, Birna Heinesen, kassameistari, Magni Høgnesen, stýrislimur.

Varalimirnir eru Petra Arge Eliasen og Nikolina Olsen.

Semja undirskrivað

Seinnapartin 9. januar 2024 var Stýrið í Tinganesi og skrivaði undir semju við Fíggjarmálaráðið. Nýggi sáttmálin og nýggju lønartalvurnar, sum eru galdandi frá 1. oktober 2022 til 30. september 2025, verða tøk sum skjótast á heimasíðu okkara og á heimasíðuni hjá Fíggjarmálaráðnum.

30/12-2023

Innkalling til aðalfund hjá

Yrkisfelagnum Miðnámi

Aðalfundur felagsins verður leygardagin 20. januar 2024 kl. 14.00 á Miðnámi á Kambsdali.

Skrá sambært viðtøkunum:

a. Velja fundarstjóra og tveir skrivarar

b. Góðkenna skránna

c. Ársfrágreiðing til góðkenningar

d. Grannskoðaður roknskapur leggjast fram og góðkennast

e. Góðkenna fíggjarætlan og áseta limagjald

f. Mál frá stýri og limum

g. Stýrisval

h. Velja tveir grannskoðarar millum limirnar

i. Ymiskt

Undir punkt g. kann upplýsast, at Birna Heinesen, Maria C. Nielsdóttir og Hallur Oskar Olsen standa fyri vali. Hallur stillar ikki upp aftur.

Eisini skal ein varalimur veljast.

Kunning

Mál sum á skrá á aðalfundinum, skulu verða Stýrinum í hendi skrivliga í seinasta lagi leygardagin 6. januar á yf@yf.fo.

Uppstillingar til stýrisvalið skulu vera granskoðarunum Høgna av Skarði, has@glasir.fo, og Brynjálvi I. Johansen, bij@glasir.fo, í hendi í seinasta lagi leygardagin 6. januar.

Tveir stillarar skulu senda váttan fyri hvønn uppstillaðan.

Endalig skrá við mannagongdum í sambandi við valið, tilmelding o.ø. verður send út í seinasta lagi 10 dagar áðrenn fundin.

Við fakfelagskvøðu

Vegna Stýrið

Birna Heinesen, forkvinna

Samhugaverkfall 3. novembur 2023

Yrkisfelagið Miðnám fer í samhugaverkfall við Felagnum Føroyskir Sjúkrarøktarfrøðingar.

Yrkisfelagið Miðnám boðar við hesum frá, at felagið lýsir samhugaverkfall á sáttmálaøkinum millum Fíggjarmálaráðið og Yrkisfelagið Miðnám at galda frá kl. 07.00 fríggjadagin 3. novembur 2023 til kl. 17.00 fríggjadagin 3. novembur 2023.

Samhugaverkfallið umfatar limir felagsins, sum eru umfataðir av sáttmálanum millum Yrkisfelagið Miðnám og Fíggjarmálaráðið.

Birna Heinesen á samráðingarfundi í NLS

Í hesum døgum, meðan vit sjálvi eru til samráðingar, er Birna Heinesen farin til Danmarkar á netverksfund fyri samráðingarleiðarar í fakfeløgunum í Norðurlondum.

Ætlanin við hesum fundum er at geva hvør øðrum íblástur og skifta orð um royndir í sambandi við samráðingar.

Hetta er fyrsti fundur av sínum slag, og hava fakfeløgini í dag havt framløgur um samráðingarskipanirnar í ymisku londunum og eisini hevur orðaskifti verið um lønarlag, trýpartasamráðingar og samstørv millum fakfeløg.

Nú byrja samráðingarnar

15. sep. 2023 handaði Stýrið Fíggjarmálaráðnum krøvini til sáttmálasamráðingarnar.

Samstundis fekk Stýrið krøvini frá Fíggjarmálaráðnum. Partarnir hittast aftur 29. september.

Væl vitjaður aðalfundur í Varðagøtu (januar 2023)

Takk fyri ein hugnaligan, lívligan og gevandi aðalfund!

Tað er at fegnast um, at undirtøkan á fundinum var so stór, og at vit aftur kundu vera í hugnaligu húsunum í Varðagøtu!

Tað var áhugavert at hava vitjan av nýggja landsstýrismanninum og fulltrúanum á okkara øki.

Vit upplivdu ein vilja til at lurta eftir okkara sjónarmiðum og vónandi fara vit at hava eitt gott samstarv, har úrslit eisini fara at vísa seg, okkara limum, næmingum og samfelag at gagni.

Nýggja Stýrið fer í næstum at skipa seg!

Niðanfyri kunnu orðini, sum forkvinnan segði áðrenn landsstýrismaðurin fekk orðið, lesast:

"Hvorfor see Blomsterne saa daarlige ud i dag?" (Andersen, 1835, s. 1)

Soleiðis spyr lítla Ida studentin í ævintýrinum Den lille Idas Blomster, sum H.C. Andersen skrivaði í 1835. Studenturin svarar, at hálvfølnaðu blómurnar, sum Ida hentaði í gjár, síggja soleiðis út, tí tær hava verið í veitslu um náttina. Vit síggja, hvussu Ida livir seg inn í frásøgnina hjá unga studentinum, meðan tey eldru í ævintýrinum halda, at tað er fjas at billa gentuni slíkt inn. Síðst í ævintýrinum sigur hon:

"og naar siden de norske Fættere kommer herhen, saa skal de være med at begrave Eder ude i Haven, at I til Sommer kan voxe op og blive endnu meget smukkere.!" (Andersen, 1835, s. 5)

Gentan lærdi nakað týdningarmikið frá studentinum, hon lærdi nakað um lívið og deyðan; um tað, sum fer, og tað, sum kemur.

Hetta ævintýr sigur okkum, at undirvísing skal læra næmingarnar okkurt. Hon skal vera læring millum javnlíkar, ið síðan skal lyftast upp á eitt hægri fatanarstig. Studenturin í ævintýrinum fór niður á sama stig sum Ida eina løtu, meðan tey vaksnu ristu við høvdinum.

Soleiðis kann tað ofta kennast at vera lærari. Vit eru sum studenturin í søguni, ið er noyddur at laga seg til fatanarstigið hjá Idu. Og hini, sum ikki kenna okkara lærugreinir ella umstøður at arbeiða undir, skilja ikki altíð okkara støðu, hóast mong munnu vera samd um, at tíðin á miðnámi var góð.

Mong sita við kensluni, at vit lærarar eru ósjónligir í samfelagnum. Tað er sjáldan, at okkara arbeiði er viðgjørt millum almenningin. Kanska tí vit nettupp laga okkum eftir umstøðunum og eftir næmingunum, ið hava ymiskan tørv. Alskurin til okkara lærugrein og drívmegin at læra komandi ættarlið tað, sum krevst fyri at sleppa víðari, ger, at vit klára at halda okkum uppundan, eisini úti á djúpum sjógvi, tí soleiðis eru treytirnar í okkara arbeiði.

Tí stúri eg fyri, hvussu langt út hin einstaki lærarin svimur fyri at røkka málinum. Hyggja vit at broytingunum, sum hava verið, síðan vit fingu nýggja miðnámsskúlaskipan, har endamálið var at spara landskassanum pengar, er svarið, at miðnámsskúlalærarin er noyddur at svimja sera langt út fyri at røkka sínum fakligu málum.

Tí vóna vit at vit fara at hava eitt gott samstarv við nýggja landstýrismannin, nýggja aðalráðið og tey fólkini, sum nú umsita okkara øki.

Og at vit sum fakfelag og fakfólk verða vird og hoyrd, tá avgerðir skulu takast, sum raka okkum og okkara øki.

Innkalling til aðalfund hjá Yrkisfelagnum Miðnámi (januar 2023)

Aðalfundur felagsins verður fríggjadagin 20. januar 2023 kl. 19.00. Gestarøðarin, sum í ár er Djóni Nolsøe Joensen, kemur kl. 18.00. Neyðugt er við tilmelding á yf@yf.fo, sum skal vera okkum í hendi í seinasta lagi mánadagin, 16. januar 2023.

Skrá áðrenn fundin:

18.00 Forkvinnan bjóðar vælkomin og sigur nøkur orð

18.10 Landsstýrismaðurin fær orðið

- Høvi verður at seta spurningar.

19.00 Fundurin byrjar. Døgurði verður at fáa á fundinum.

Aðalfundurin verður skipaður við skrá sambært viðtøkunum:

a. Velja fundarstjóra og tveir skrivarar

b. Góðkenna skránna

c. Ársfrágreiðing til góðkenningar

d. Grannskoðaður roknskapur leggjast fram og góðkennast

e. Góðkenna fíggjarætlan og áseta limagjald

f. Mál frá stýri og limum:

I. Broyting í viðtøkum: flyta aðalfundin til seinni á árinum (Stýrið)

II. Umfatandi umvælingar av húsunum í Varðagøtu (Stýrið)

III. Stýrið biðir aðalfundin um heimild til at kanna keyp av frítíðarhúsi (Stýrið)

g. Stýrisval

I. Stýrisvalið er avgreitt. Varalimir skulu veljast.

h. Velja tveir grannskoðarar millum limirnar

i. Ymiskt

Undir punkt g. kann upplýsast, at Búgvi Poulsen stóð fyri valið. Magni Høgnesen, tók sum varalimur sæti fyri Olgar Danielsen, og stóð eisini fyri valið. Búgvi valdi ikki at stilla upp aftur.

Tá freistin var farin fríggjadaign 6. januar, vóru tvey uppstillað til stýrisvalið. Hesi vóru Magni Høgnesen, sum starvast á Kambsdali og Tina Jakobsen, sum starvast á Glasi. Tey bæði eru vald – hjartaliga til lukku!

Stýrið hevur í samráð við granskoðararnar avgjørt, at vit skjóta upp fyri fundin, at varalimir skulu veljast á fundinum.

Praktisk viðurskifti

Fundurin verður ætlandi í fakfelagshúsinum í Varðagøtu 8. Um undirtøkan verður størri enn vit rúma í Varðagøtu, flyta vit fundin. Kunning um hetta kemur 1-2 dagar áðrenn fundin.

Um onkur er, sum ikki er limur, men vil tekna seg sum lim, eru tey vælkomin at møta upp á aðalfundinum og tekna seg tá. Neyðugt er at gjalda limagjald fyri januar mánaða fyri at hava atkvøðurætt á aðalfundinum.

Við fakfelagskvøðu

Vegna Stýrið

Birna Heinesen, forkvinna

Yrkisfelagið Miðnám ynskir øllum eini gleðilig jól og eitt gott nýggjár (desember 2022)

Vit ynskja øllum limum og samstarvsfeløgum eini gleðilig jól og eitt gott nýggjár!

Myndin er tikin á seinasta stýrisfundi í NLS - Nordiska Lärarorganisationers Samråd, har forkvinnan luttók.

Fundurin varð hildin í Tåby norðanfyri Stokkholm í hugnaligum og jólaligum umhvørvi seinast í novembur.

Hóast umhvørvið var hugnaligt, so er boðskapurin frá fakfeløgunum ikki so hugnaligur: vit mangla, og fara at mangla lærarar í øllum Norðurlondum komandi tíðina.

Størsta uppgávan er tískil at standa saman fyri at loysa avbjóðingarnar, so at vit sum starvast við at menna og útbúgva okkara børn og ungu, fáa tær umstøður sum eru neyðugar.

Hetta ynskja vit okkum ikki bert í jólagávu. Vit ynskja okkum hetta sum eitt langtíðar politiskt mál!

Fyri okkara børn, fyri okkara ungu og ikki minst fyri okkara samfelag.

Forkvinnan á skeiði hjá NLS í Nyborg

Í farnu viku var forkvinnan í YF á summarskeiði hjá NLS – Nordiska Lärarorganisationers Samråd, saman við tveimum nevndarlimum í Føroya Lærarafelag

NLS er ein felagskapur fyri fakfeløg í Norðurlondum, ið hava limir sum starvast frá vøggustovu til og við miðnám. NLS skipar fyri summarskeiði annaðhvørt ár í einum av limalondunum, og í ár var summarskeiðið í Nyborg í Danmark. Evnið á skeiðnum var arbeiðsumhvørvi og vóru fyrilestrahaldarar í stóran mun úr Danmark.

Á fyrilestrunum vóru millum annað evni sum haldfør menning, arbeiðsbyrða, karmar, tilfeingi og talgilding, viðgjørd.

”Eg haldi tað vera týdningarmikð hjá okkum fakfeløgum í Føroyum at samstarva við fakfeløgini í hinum londunum. Á skeiðnum hava vit sæð og hoyrt hvørjar avbjóðingar eru í hinum londunum og hvussu tær verða loystar, og samstundis kunnu vit greiða frá hvussu vit gera í Føroyum. Tá 100 fólk, sum brenna fyri sínum arbeiði, eru saman til kjak og fyrilestrar í 5 heilar dagar, so kemur øðiliga nógv burturúr”, sigur forkvinnan.

Tey trý sum umboðaðu Føroyar, forkivnnan úr Yrkisfelagnum Miðnámi, Birna Heinesen, Eyðbjartur Sólheyg Skaalum, nevndarlimur í nevndini hjá Føroya Lærarafelag og Jona Højsted, kassameistari í nevndini í Føroya Lærarafelag, eru øll samd um, at hesi skeið eru sera týdningarmikil, tí so nógv spyrst burturúr, sum kann brúkast í fakfelagsarbeiðinum, so vónandi koma fleiri við á næsta summarskeið.

Tey trý eru avmyndað til veitsluna sum var seinasta kvøldi á skeiðnum.

Stýrið hevur skipað seg

Á fyrsta stýrisfundi eftir aðalfund felagsins 28. januar 2022, hevur Stýrið skipað seg á fundi 2. februar 2022:

Birna Heinesen, forkvinna

Búgvi Poulsen, næstformaður

Hallur Oskar Olsen, kassameistari

Maria Chun Nielsdóttir, skrivari

Olgar Danielsen tók avgerð á fundinum um at taka seg úr nevndini. Tískil kemur Magni Høgnesen í nevndina fyri Olgar Danielsen, fráfarandi formann.

Stýrið takkar Olgari fyri stóra arbeiðið, hann hevur lagt í Yrkisfelagið síðani feløgini vóru løgd saman í 2013, og undan tí í Handilsskúlalærarafelagnum í tíðarskeiðnum 2007 - 2013. Olgar hevur samvitskufult røkt starvið sum kassameistari í seks ár, og seinastu tvey árini hevur hann verið formaður felagsins.

Úrslit av stýrisvali 2022

Vald inn í Stýrið:

Maria Chun Nielsdóttir

Birna Heinesen

Hallur Oskar Olsen

Tiltakslimir

Magni Høgnesen

Suni Y. Petersen jan. 2022

Semjan undirskrivað

YF og Fíggjarmálaráðið hava í dag skrivað undir semju um nýggjan sáttmála. Sáttmálin verður galdandi fyri tíðarskeiðið frá 1. oktober í 2020 til tann 30. september 2022.

Semjan hevur millum annað við sær, at lønirnar hækka 2,05% 1. januar og 1,25% 1. oktober í ár.

Stýrið

Á myndini eru frá vinstru: Høgni av Skarði, Búgvi Poulsen og Olgar Danielsen frá YF, Jørgen Niclasen og Bjarni Mortensen frá Fíggjarmálaráðnum og Eyðun Jacobsen frá Undirvísingarstýrinum. Mynd frá fmr.fo

Stýrið skipað seg eftir aðalfundin

Búgvi Poulsen og Olgar Danielsen vóru afturvaldir í stýrið, og Magni Høgnesen valdur til tiltakslim.

Boðað verður frá, at Stýrið hevur skipað seg og heldur fram óbroytt soleiðis:

Olgar Danielsen, formaður

Búgvi Poulsen, næstformaður

Høgni av Skarði, kassameistari

Birna Heinesen, stýrislimur

Vónbjørt Tróndheim, skrivari

Magni Høgnesen, tiltakslimur.

Stýrið skipað seg

Góðu limir

Á stýrisfundinum 7. februar 2020 skipaði stýrið seg. Olgar Danielsen varð einmælt valdur til formann. Hann hevur drúgvar royndir í fakfelagsarbeiði, fyrst sum stýrislimur í Lærarafelag Handilsskúlans og síðani í samanlagda stýrinum í YF Miðnám. Tey seinastu árini hevur hann røkt starvið sum kassameistari.

Búgvi Poulsen heldur fram sum næstformaður. Hetta er fjórða árið hjá honum í stýrinum. Nýggur kassameistari er Høgni av Skarði, sum hevur sitið í stýrinum síðani 2018. Vónbjørt Tróndheim varð vald sum skrivara. Hon var útbúgvingarleiðari í fýra ár í Hoydølum og røkti í hesum sambandi eisini skrivarauppgávur. Birna Heinesen er vanligur limur. Sum forkvinna í lærararáðnum á Kambsdali hevur hon eisini viðkomandi royndir.

Nikolina verið á NLS fundi í Álandi

Nordisk Lærerorganisations Samråd - Yrkisfelagið Miðnám, Lærarafelagið og Pedagogfelagið hava 21. og 22. mai verið á norðurlendskum fundi í Álandi, har ymisk viðurskifti hava verið til viðgerðar.

Umframt at leggja ætlanir fyri virksemið komandi tvey árini, varð ein eftirmeting gjørd av summarskeiðnum, ið varð hildið í Føroyum í fjør, har 134 luttakarar vóru úr øllum norðanlondunum. Eftirmetingin vísti, at nærum øll vóru sera væl nøgd við skeiðið.

Eisini varð kunnað um arbeiðsviðurskifti í Álandi, ið á sama hátt, sum vit í Føroyum, líða undir manglandi viðlíkahaldi og nýbygging av skúlum og stovnum. Víst varð eisini á, at strongd og harðskapur er ein vaksandi trupulleiki í norðurlendskum høpi, og verða lærarar og námsfrøðingar, í størri mun enn áður, rakt av hesum.

Fundurin er eitt forum, har vit í norðanlondum kunnu byggja netverk, og har kunnað verður um, hvat ymisku londini arbeiða við.

Á myndini eru frá vinstru:

Jacob Eli S. Olsen, formaður Føroya Lærarafelags, Nikolina Olsen, forkvinna Yrkisfelagsins og Jógvan Philbrow, formaður Føroya Pedagogfelags.

Til ber at lesa um NLS á heimasíðu felagsskapsins.

Semja undirskrivað millum Yrkisfelagið og Fíggjarmálaráðið

Margreta Knudsen hevur givið okkum loyvi at leggja hesi vøkru minningarorð um fyrrverandi fakfelagsmann og starvsfelaga okkara Hans Andreas Joensen á heimasíðu YFs.

Tað vóru tung boð at frætta fyri viku síðani, at Hans Andreas var farin bara 63 ára gamal. Í fjør um hesa tíðina var hann ein fullvirkin partur av okkum á Glasi - klárur at føra flokkar til próvtøku og senda pisur á flog - so boðini komu sum ein skelkur, hóast vit høvdu hoyrt, at hann nú var álvarsliga sjúkur.

Eg havi havt Hans Andreas sum starvsfelaga bæði á Kambsdali og í Hoydølum og havi bara gott at bera honum.

Hann undirvísti í søgu og donskum, og í nakrar mánaðir arbeiddu vit í sama toymi, og var tað sera gevandi samstarv.

Hans Andreas var dámligur, spakur, fyrikomandi, hjálpsamur, gløggur, skemtingarsamur og filosoferandi millum so mangt annað, hann var, og tað var altíð hugnaligt at vera har, hann var. Hann hevði henda serliga, gløgga humorin sum fáur annar, samstundis sum hann ikki gjørdi stórt hóvasták burtur úr sær sjálvum.

Við øllum sínum eginleikum fekk Hans Andreas bæði starvsfólk og næmingar at kenna seg væl, og eg veit, at hann eisini var væl dámdur og høgt virdur sum lærari, tí hann var fakliga sterkur og áhugaður, tolin og góður við næmingarnar.

Eg vil við hesum fáu reglum æra minnið um Hans Andreas og takka fyri tað, hann var fyri okkum øll sum starvsfelagi.

Í djúpastu samkenslu við familjuni.

Margreta

TIL MINNIS UM HANS ANDREAS DAM JOENSEN

Margreta Knudsen hevur givið okkum loyvi at leggja hesi vøkru minningarorð um fyrrverandi fakfelagsmann og starvsfelaga okkara Hans Andreas Joensen á heimasíðu YFs.

Eg havi havt Hans Andreas sum starvsfelaga bæði á Kambsdali og í Hoydølum og havi bara gott at bera honum.

Hann undirvísti í søgu og donskum, og í nakrar mánaðir arbeiddu vit í sama toymi, og var tað sera gevandi samstarv.

Eg vil við hesum fáu reglum æra minnið um Hans Andreas og takka fyri tað, hann var fyri okkum øll sum starvsfelagi.

Í djúpastu samkenslu við familjuni.

Margreta

Mánadagur 26. februar 2018

Góðu limir

Sum kunnugt skipaði Stýrið seg fríggjadagin 23. feb. 2018. Nikolina Olsen varð einmælt vald til forkvinnu. Hon tekur drúgvar royndir sum álitisfólk á Kambsdali við sær í Stýrið. Næstformaður gjørdist Búgvi Poulsen, sum hevur sitið sum skrivari í Stýrinum seinasta árið. Olgar Danielsen hevur drúgvar royndir í Stýrinum og heldur fram sum kassameistari, og nývalda Tina K. Jakobsen er nýggjur skrivari. Heilt nýggj er hon tó ikki í fakfelagssamanhangi, tí hon hevur verið álitisfólk á Setrinum eitt tíðarskeið. Høgni av Skarði er eisini nývaldur í Stýrið, og er hann vanligur stýrislimur. Høgni hevur drúgvar royndir innan leiðslu á Glasi.

Á stýrisfundi í dag hevur Stýrið skipað seg

fríggjadagur 23. februar 2018

Nikolina Olsen, forkvinna

Búgvi Poulsen, næstformaður

Olgar Danielsen, kassameistari

Tina K. Jakobsen, skrivari

Høgni av Skarði, stýrislimur

Stýrisvalið 2018

Eftir at hava bíðað eftir postinum úr Suðuroy í nakrar dagar, hava grannskoðarnir at enda talt allar atkøðurnar upp. Trý stóðu fyri vali hesa ferð. Valluttøkan var góð, 76% av limunum greiddu atkvøðu. 200 atkvøðuseðlar vórðu sendir út til limirnar og 152 gildugir atkvøðuseðlar vóru, tá grannskoðararnir høvdu talt upp.

Tey valdu vóru:

Nikolina Olsen, Høgni av Skarði og Tina K. Jakobsen

Tiltakslimur:

Janus Norðberg

Samandráttur frá aðalfundinum í YF 20. Januar 2018.

Einir 40 limir vóru møttir, nakað meira enn undanfarin ár. Kári Holm Johannesen, sosiologur, hevði eina framløgu um høgan kendleika í Føroyum, har hann millum annað kom inn á, at vit kenna hvønn annan í nógvum ymsum samanhangum, og hvussu hetta ávirkar okkum. Sum undirvísarar á miðnámi kenna vit støðurnar væl aftur í yrki og privatlívi. Fleiri viðmerkingar og spurningar vóru til sera áhugaverdu framløguna, sum eisini stundum varð avbrotin, tá fundarluttakararnir høvdu lyndi at brosa heldur harðmælt, tá teir kendu seg aftur í dømum, Kári dróg fram. Tá framløga og kjak varð liðugt, var stuttur steðgur áðrenn sjálvur aðalfundurin byrjaði.

Hans Jacob Kollslíð varð valdur til fundarstjóra og stýrdi aðalfundinum við kønari hond. Valdu skrivararnir, Tina Jacobsen og Súsanna Eikhólm høvdu úr at gera við knappaborðini á lívliga fundinum, men hóast eymar fingrar varð fundurin væl og hegnisliga dokumenteraður.

Formaðurin greiddi frá farna ári, har sáttmálin endaliga kom uppá pláss í sept., men varð longu uppsagdur frá 1. okt. og longu áðrenn hetta varð ósemja um tulkingina av lønini fyri BV hjá HF-arum, sum endaði við at sendu málið í Fasta Gerðarrættin.

Aftaná drúgvt avkotingararbeiðið er endiliga funnið fram til, hví vit eftir at nýggja breytarskipanin, var sett í gildi, undirvísa nógv meira (og tískil hava fleiri flokkar og fleiri næmingar): Høvuðsorsøkin er nógv minkaða undirvísingartímatalið í flestu lærugreinunum; oman á hetta kemur minkingin í skrivliga arbeiðnum og próvtøkutalinum. Sostatt er breytaskipanin ein klárt verri undirvísingarskipan fyri næmingar enn undanfarna skipan; hetta samstundis sum strongdin hjá lærarum veksur og trivnaðurin fellur. Tí hevur YF í endurskoðanarbólkinum skotið upp, at næmingartíðin á búskapar-, hug- og náttúrubreyt verður hækkað upp til 780 tímar, sum er á tøknibreytini. Somuleiðis verður mælt til, at talið á próvtøkum, verður hækkað aftur, eisini verður mælt til, at næmingatíðin, rektarin hevur at ráða yvir sambært § 62 í undirvísingarkunngerðini, verður økt úr 5 tímum og upp í 15 tímar til hvønn næming.

Pedagogikum er aftur støðgað, tí hevur Stýrið sent Mentamálaráðnum skriv, har víst verður á, at í fíggjarlógarjáttanini fyri 2017 stendur viðmerkt, at praktiskt pædagogikum heldur fram, og aftur í fíggjarlógini fyri 2018 er viðmerkt, at praktiskt pedagogikum skal raðfestast hægst. Sostatt er opnað fyri eini uppfylgjan av málinum, har víst kann vera á møguligt lógarbrot.

YF hevur havt samband við AKF um samanlegging seinasta árið og bað formaðurin um loyvi at halda fram við hesi tilgongd.

Sáttmálasamráðingar standa fyri durum og tí luftaði formaðurin ymsar tankar hesum viðvíkjandi.

Aftaná var drúgvt og lívligt orðaskifti - serliga um kæruna um rektaran á Glasi

Formansrøðan varð einmælt samtykt.

Roknskapur og fíggjarætlan vórðu løgd fram og góðkend uttan tað stóra hóvastákið. Limagjaldið verður óbroytt.

Grannskoðararnir kunnaðu um uppstillingina til stýrisvalið. Trý standa fyri vali, og fýra vóru uppstillað, so aftur hesa ferð verður stríðsval. Kassameistarin, Olgar Danielsen, og skrivarin, Búgvi Poulsen, standa ikki fyri vali og halda sostatt fram í stýrinum.

Tey uppstillaðu eru Nikolina Olsen (Kambsdalur), Janus Norðberg (Glasir, Marknagil), Tina Jacobsen og Høgni av Skarði (bæði á Glasi, Hoydalar). Grannskoðararnir Christian Ihlen og Sámal Matras Kristiansen, sum báðir vórðu einmælt afturvaldir, skipa fyri valinum í næstum.

Kári Jespersen, formaður felagsins, boðaði á aðalfundinum frá, at hann ikki stillar upp aftur eftir 19 árum í stýrinum, herav tey seinastu 8 árini sum formaður. Samstundis stillar Henriette Svenstrup heldur ikki upp eftir 10 ár í stýrinum, tey seinastu árini sum næstforkvinna. Ein stór tøkk til tykkum bæði fyri langa og trúgva tænastu.

Aðalfundurin gekk væl, hóast nakað longri enn vanligt, so tað vóru svangir fundarluttakarar, sum fingu sær upp á tallerkarnar eftir fundin. Skrivararnir lósu drúgvu fundarfrágreiðingina upp undir borðhaldinum, og við lógvabrestum varð hon góðkend. Restin av kvøldinum var merkt av hugnaligari samveru og práti millum YF limirnar, sum høvdu leitað sær oman í Varðagøtu 8 hendan frálíka vetrardag.

Stýrið

Her er semjan og lønartalvurnar (14. januar 2018)

Yvirlýsing frá fakfeløgunum (9. januar 2018)

Minningarorð um Poul Erik Smedemark, 3/5 1949 - 5/1 2018.

“Poul Erik er farin”. Tú steðgar at anda eina løtu, tá ið tú frættir hetta. Hetta eru tung boð og fáa, tí tað er svárt er at missa góðar vinir. Hugurin sveimar og minnini koma fram um henda nógv umhildna studentaskúlalæraran.

Poul Erik var ikki mikil maður í berum orðum, men fylti hann so mikið meira, í tí hann tókst við; tað, hann segði og gjørdi, var so mikið dygdargott og borgaði fyri so nógvum góðum, at tað ríkiliga fylti málið og dróg avriksglæmu uttan um mannin.

Poul Erik var av dyggastu stuðlum, Yrkisfelagið Miðnám hevur havt. Hann varð valdur í Stýrið í 1999 og sat til 2012. Øll árini sum kassameistari. Hetta starv røkti hann til lítar. Hansara partur lá ikki eftir.

Poul Erik var dani og kom til Føroya í 1976 til at vera lærari á HF í Suðuroy. Hann undirvísti í støddfrøði og alisfrøði. Hann búsettist á Tvøroyri og tók lut í mongum, sum hoyrdi lokalsamfelagnum til. Hann var góður fótbóltspælari og var m.a. við at vinna føroyameistaraskapið við TB í 1977. Eftir at hann gavst at undirvísa á Miðnámi, hevur hann verið formaður í TB og ein meginstigtakari til at leggja fótbóltsliðini í Suðuroy saman. Hann var eisini stigtakari til at fáa nýggjan vøll inni í Trongisvági.

Tá ið tunnilin millum Hov og Ørðavík skuldi gerast, vildi landsverk leggja tunnilin rættiliga ovarliga í fjallið. Men tá var tað, at Poul Erik saman við øðrum vísti síni roknikynstur og fekk sannført bæði landsverk og politikkarnar um, at tunnilin lá betri longur niðri. Nú er ongi í iva um, at hetta var rætta loysnin.

Eisini eftir at hann fór úr Stýrinum í YF, hevur hann verið okkum ein dyggur stuðul til at gera neyvar útrokningar at nýta í sáttmálasamráðingunum. Poul Erik var trúfastur, hevði hjartað á røttum staði og var álitismaður. Ongi evni vóru ov smá og ongi ov stór at koma til hansara við.

Poul Erik giftist við Margit f. Larsen av Tvøroyri. Tey fingu tríggjar synir Brian, Jan og Allan. Nú eru bæði Margit og Poul Erik farin.

Yrkisfelagið ber fram sína djúpastu samkenslu við teimum eftirsitandi.

Við hesum fáu orðum lýsa vit frið yvir minnið um starvsfelagan og fakfelagsmannin Poul Erik Smedemark.

Hvíl í friði.

Vegna

Yrkisfelagið Miðnám.

Kári Jespersen

YF-stýrið skipaði seg 10. mars 2017, soleiðis:

Formaður: Kári Jespersen, FSH
Næstforkvinna: Henriette Svenstrup, FSH
Skrivari: Búgvi Poulsen, FSH
Kassameistari: Olgar Danielsen, MÁK
Stýrislimur: Janus Norðberg; FH

Report abuse