Yrkisfelag Miðnám

Endamál felagsins er at virka til frama fyri útbúgvingar á miðnámsskúlaøkinum, øðrum útbúgvingum og útbúgvingartongdum økjum á javnmettum stigi, at røkja áhugamál limanna, bæði fíggjarliga, starvsliga og fakliga.

Nikolina verið á NLS fundi í Álandi

Nordisk Lærerorganisations Samråd - Yrkisfelagið Miðnám, Lærarafelagið og Pedagogfelagið hava 21. og 22. mai verið á norðurlendskum fundi í Álandi, har ymisk viðurskifti hava verið til viðgerðar.

Umframt at leggja ætlanir fyri virksemið komandi tvey árini, varð ein eftirmeting gjørd av summarskeiðnum, ið varð hildið í Føroyum í fjør, har 134 luttakarar vóru úr øllum norðanlondunum. Eftirmetingin vísti, at nærum øll vóru sera væl nøgd við skeiðið.

Eisini varð kunnað um arbeiðsviðurskifti í Álandi, ið á sama hátt, sum vit í Føroyum, líða undir manglandi viðlíkahaldi og nýbygging av skúlum og stovnum. Víst varð eisini á, at strongd og harðskapur er ein vaksandi trupulleiki í norðurlendskum høpi, og verða lærarar og námsfrøðingar, í størri mun enn áður, rakt av hesum.

Fundurin er eitt forum, har vit í norðanlondum kunnu byggja netverk, og har kunnað verður um, hvat ymisku londini arbeiða við.

Á myndini eru frá vinstru:

Jacob Eli S. Olsen, formaður Føroya Lærarafelags, Nikolina Olsen, forkvinna Yrkisfelagsins og Jógvan Philbrow, formaður Føroya Pedagogfelags.

Til ber at lesa um NLS á heimasíðu felagsskapsins.

Semja undirskrivað millum Yrkisfelagið og Fíggjarmálaráðið

Í dag, 9. mai, varð trý ár semja undirskrivað millum YF og FMR. Talan er um trý ára sáttmála fyri tíðarskeiðið 1. oktober 2017 til 1. oktober 2020.

1. oktober 2017 hækkar lønin 2,3%

1. oktober 2018 hækkar lønin 2,5%

1. oktober 2019 hækkar lønin 2,56%

Harafturat eru nakrar tillagingar gjørdar.

Á myndini eru frá vinstru:

Olgar Danielsen, Búgvi Poulsen, Tina K. Jakobsen, Høgni av Skarði, Nikolina Olsen, Kristina Háfoss og Bjarni Mortensen (mynd: fmr.fo)

TIL MINNIS UM HANS ANDREAS DAM JOENSEN

Margreta Knudsen hevur givið okkum loyvi at leggja hesi vøkru minningarorð um fyrrverandi fakfelagsmann og starvsfelaga okkara Hans Andreas Joensen á heimasíðu YFs.

Tað vóru tung boð at frætta fyri viku síðani, at Hans Andreas var farin bara 63 ára gamal. Í fjør um hesa tíðina var hann ein fullvirkin partur av okkum á Glasi - klárur at føra flokkar til próvtøku og senda pisur á flog - so boðini komu sum ein skelkur, hóast vit høvdu hoyrt, at hann nú var álvarsliga sjúkur.

Eg havi havt Hans Andreas sum starvsfelaga bæði á Kambsdali og í Hoydølum og havi bara gott at bera honum.

Hann undirvísti í søgu og donskum, og í nakrar mánaðir arbeiddu vit í sama toymi, og var tað sera gevandi samstarv.

Hans Andreas var dámligur, spakur, fyrikomandi, hjálpsamur, gløggur, skemtingarsamur og filosoferandi millum so mangt annað, hann var, og tað var altíð hugnaligt at vera har, hann var. Hann hevði henda serliga, gløgga humorin sum fáur annar, samstundis sum hann ikki gjørdi stórt hóvasták burtur úr sær sjálvum.

Við øllum sínum eginleikum fekk Hans Andreas bæði starvsfólk og næmingar at kenna seg væl, og eg veit, at hann eisini var væl dámdur og høgt virdur sum lærari, tí hann var fakliga sterkur og áhugaður, tolin og góður við næmingarnar.

Eg vil við hesum fáu reglum æra minnið um Hans Andreas og takka fyri tað, hann var fyri okkum øll sum starvsfelagi.

Í djúpastu samkenslu við familjuni.

Margreta

Limafundur um semju millum YF og Fíggjarmálaráðið

Góðu YF limir

Nú eru vit komin fram til eina semju við Fíggjarmálaráðið, og vilja vit fegin kunna limirnar um hetta á fundi, áðrenn skrivað verður undir.

Limafundurin verður mikudagin 8. mai, kl. 16.30 í YF húsinum, Varðagøtu 8 í Tórshavn.

Stýrið

MEINHARD FYRSTA NÁMSFRØÐILIGA KANDIDATSPRÓGVIÐ Á GLASI

Meinhard Jensen, sum dagliga undirvísir í enskum á Kambsdali tók, sum tann fyrsti, verkliga partin av námsfrøðiligu útbúgvingina í nýggja bygninginum á Glasi.

Vegleiðararnir vóru Vónbjørt Tróndheim og Súsanna Debes Hammer.

Á myndini eru frá vinstru:

Vónbjørt Tróndheim, vegleiðari, Egil D. Jacobsen, Námsleiðari, Meinhard Jensen, Súsanna Debes Hammer, vegleiðari og Kalpana Vijayavarathan, uttanhýsis próvdómari.

Kelda: Glasir.fo

Valúrslit

YF-valið og atkvøðugreiðslurnar eru nú tald upp.

Úrslit av YF-stýrisvalinum 2019

Afturvaldir í YF-stýrið eru Olgar Danielsen og Búgvi Poulsen. Suni Y. Petersen er tiltakslimur.

Atkvøðugreiðsla um lógarbroytingar

Lógarbroytingin er samtykt við 84,5% av latnu atkvøðunum.

Atkvøðugreiðsla um formaður/-kvinna skal vera í føstum starvi innan sáttmálaøki YFs

Atkvøðugreiðslan er samtykt við 72,4% av latnu atkvøðunum. Sostatt skal formaður/-kvinna vera í føstum starvi.

Hver underviser har ansvar for stadig flere elever og studerende på gymnasier, universiteter og professionshøjskoler.


14. februar varð Hanna Jensen tilnevnd landstýrisfólk í mentamálum. Ábyrgdarøkið er útbúgvingar- og skúlamál.

Á heimasíðuni hjá løgmansskrivstovuni stendur millum annað:

"Hetta verður ein ómetaliga spennandi avbjóðing. Útbúgving og skúli hava altíð verið hjartamál hjá mær, og eg gleði meg at sleppa í gongd. Sama um valskeiðið er farið at halla, so eri eg ikki iva um, at vit fara at avgreiða nógv mál komandi mánaðirnar," sigur Hanna Jensen, landsstýriskvinna í skúlamálum.

Stýrisval og atkvøðugreiðsla um nýggjar viðtøkur fyri Yrkisfelagið Miðnám

Í viku 7 er stýrisval og atkvøðast skal samstundis um at broyta viðtøkurnar/lógirnar fyri YF. Á teimum ymisku starvsstøðunum skipa álitisfólkini fyri valinum og útflýggja atkvøðuseðlarnar.

Niðanfyri síggja tit uppskotið til nýggjar viðtøkur fyri YF og Galdandi lóg fyri YF

Uppskot til nýggja lóg fyri YF Miðnám - 2019 08.02.pdf

Uppskotið til nýggjar viðtøkur


YF Lógir - Galdandi lóg frá 2014.pdf

Galdandi lóg


Yrkisfelagið Miðnám stuðlar Ljósmøðrafelagnum

Yrkisfelagið Miðnám vil hervið lýsa sín treytaleysa stuðul til Ljósmøðrafelagið í stríði teirra um at fáa betri sømdir fyri limir sínar.

Eisini vilja vit heita á Fíggjarmálaráðið um at finna eina góða loysn saman við Ljósmøðrafelagnum.

18. nov. 2018